مقالات

انا والفيب من الباسيتو ل السلام عليكم … ا: كامل صالح

بدايتي مع الفيب 

لحد شهر 5/2021 في التاريخ ده جالي مرض كورونا اللعين و كنت بين الحياة والموت وعديت منه بسلام بفضل الله بس جسمي تعب جدا وخاصة صدرى والرئتين تقريبا باظو ومابقتش قادر اشرب سجاير خالص وكل ما اشرب اتعب ومش قادر ابطل لدرجة اني وانا عندى كورونا كنت برده بشرب سجاير لان جسمي كان محتاج النيكوتين وكانت عاده اصيله فيا لاني بدخن وانا عمري 14 سنه ودلوقتي عندي 43 سنه  يعني فوق ال 26 سنه بدخن 

في حوالي سنة 2014 كنت بسمع كتير عن الفيب والسجائر الالكترونيه والشيشه وانهم وسيلة لتبطيل التدخين بس ماكنتش مقتنع وكنت بشوف الاجهزه مع الناس حاجات رفعيه وصغيره كده وفيها لمبه بتنور و بيطلعوا دخان ضعيف ومالوش ريحه وماكنتش مقتنع بيه بصراحه وخاصة انه كان في كلام كتير انه بيجيب سرطان وامراض وحشه وان بيتحطله زيت وكان بالنسبالي حاجه كده بتاعة العيال التوتو وكان قليل لما بشوف حد بيستخدمه وانا بطبعي بحب السجائر الكليوباترا وكنت شره في التدخين وكنت بشرب اقل حاجه علبتين في اليوم 

لحد شهر 5/2021 في التاريخ ده جالي مرض كورونا اللعين و كنت بين الحياة والموت وعديت منه بسلام بفضل الله بس جسمي تعب جدا وخاصة صدرى والرئتين تقريبا باظو ومابقتش قادر اشرب سجاير خالص وكل ما اشرب اتعب ومش قادر ابطل لدرجة اني وانا عندى كورونا كنت برده بشرب سجاير لان جسمي كان محتاج النيكوتين وكانت عاده اصيله فيا لاني بدخن وانا عمري 14 سنه ودلوقتي عندي 43 سنه يعني فوق ال 26 سنه بدخن
وفي شهر 6/2021 شفت واحد ماسك فيب وبيدخن بس شكل الجهاز مش نفس الشكل بتاع زمان خالص وكمان لما قعدت معاه لقيته بيطلع دخان كتير وكمان ريحته حلوه جدا فسألته ايه ده فقالي سجاير الكتروني وقطم في الكلام
الموضوع سخن في دماغي وفضلت ابحث عن الفيب علي جوجل وقرأت عنه كتير وخدت فكره كويسه عنه
وبعدين قلت ما اكيد هلاقي علي الفيس جروبات للناس بتاعة الفيب ده ادخل اشوف بيقولوا ايه وبيعملواوايه
دخلت فعلا وعملت سيرش لقيت جروبات كتير اشتركت فيها وبدأت اقرأ واسأل واستفسر واتفرج علي الصور ولقيت المجال كبير قوى وواسع جدا ومليان حاجات غريبه وانا مش قا در افهم
المهم جمعت شوية معلومات كده عنه وقلت هشوف ابدأ ازاي باقل تكلفه عشان لو الموضوع طلع فاكس اخلع باقل خسائر فبحثت في جوجل لقيت فيديوهات علي اليوتيوب ناس بتشرح وبتتكلم المهم وصلت لان افضل حاجه اني ابدأ بحاجة اسمها بود سهله وبسيطه ومش مكلفه و اتفرجت علي فيديوهات البودات ولقيت انسب حاجه ليا هو بود اسمه باسيتو وموجود منه مستعمل وسعره مش عالي وسهل في اعادة البيع
دخلت علي جوجل وشفت الجهاز وقرأت عنه واتفرجت علي فيديوهات وفهمت الجهاز كويس
بعدها قررت اني هشترى جهاز باسيتو مستعمل بكويل ريبلد عشان لو ماعجبنيش ابيعه دخلت اولكس وعملت سيرش علي باسيتو وفعلا لقيت جهاز مستعمل شبه جديد سعره كويس ومعاه الكويل الريبلد ومعاه كمان ازازتين ليكود وحتة قطن
قلت هو ده
كده هعمل التجربه كلها مره واحده لانه جاهز علي الشرب
وفعلا كلمت صاحبه واتفقت معاه اني هقابله الساعه خمسه في المعادي اخده منه وخلصت شغلي الساعه 3 ورحت له واخدت منه الفيب واتكلم معايا وشرحلي الموضوع واداني ازازة 15ملي توباكو بسكوت 9 نيكوتين فيها حولي نصها وازازه 60ملي تشيز كيك فراوله فيها حوالي ربعها 9 نيكوتين برده وكنا وقتها يوم 28اغسطس 2021
ووقتها كنت مولع سيجاره وفي جيبي علبة السجائر الكليوباترا فيها 6سجاير تقريبا
واول ما مامسكت البود رميت السيجاره وقلت دي اخر سيجاره ليا ومش هشرب تاني ولو حصل ايه وانا مع الفيب ده لآخر محاوله وانا ونصيبي معاه
وقبل ما اركب الميكروباص خدت كام بف كده فعجبني الطعم جدا وركبت الميكروباص لمده نص ساعه وطبعا مادخنتش فيها وكعادتي نزلت من الميكروباص عايز اولع سيجارة🙄 ودماغي مونونه فخدت كام نفس كده من الفيب لقيت الدماغ اتحسنت شويه واحتياجي اني اشرب سيجاره قل كتير المهم الموضوع اتكرر مرتين لاني ركبت مواصلتبن كمان لحد ما وصلت للبيت وكانت الساعه بقت 8 مساء فضلت اشرب لحد الساعه 10 م وانا عاجبني الطعم جدا بس الدماغ مش مظبوطه قوى بس زى الفل انا كده بقالي خمس ساعات ماولعتش سيجاره وده انجاز كبير 😁
رميت علبة السجائر في الدرج وحطيت البود في الشاحن ونمت وقلت ربنا يسترها بقي الصبح😩
صحيت الصبح الساعه 6 عشان اروح شغلي وفطرت وشربت الشاي وجت اللحظه الحاسمه 🙄
خدت نفسين ثلاثه خمسه عشره لقيت الدنيا زي الفل
خرجت رحت شغلي وخدت البود وازازه الليكود ،😉وقلت مش هاخد السجاير ولا الولاعه

فضلت طول اليوم اشد في الانفاس واتعب شويه واقاوم شويه لحد ما اليوم خلص ونمت
صحيت تاني يوم فرحان بقالي يوم ونص مادخنتش واتكرر نفس الحوار بس في نص اليوم حصل اللي لا كان علي البال ولا الخاطر 😩😩😩😟😟😡😡🤬🤬
الليكود بقي يطلع في بوقي و البود بقي يليلك والدنيا باظت مني ومابقتش عارف اشرب ولا عارف اعمل ايه 😭😭😭
دماغي سخنت جامد وبقيت عايز اولع سيجاره ومش عارف اعمل ايه 😭😭 وهتجنن
بس انا واخد عهد علي نفسي اني مش هشرب سجاير لو حصل ايه
نزلت بوست علي الفيس بوك باللي حصل واعمل ايه كله رد عليا وقالي لازم تغير الوكايه وتعمل بيلد جديد 😩
قلت خلاص هحاول لما اروح اتصرف
المهم استحملت لحد ما وصلت البيت واول لما دخلت فكيت البود وطلعت الكويل وجبت قطنه وشغلت اليوتيوب وعملت زي الشرح بالضبط
المهم الحمد لله الدنيا ظبطت شويه بس مش قوى بس المهم أن الدنيا مشيت وعرفت اشرب
وفضلت طول الليل اشرب شويه والبود يليك واغير القطنه واشرب والاقي ليكود في بوقي وحاجه اخر قرف
نمت مقريف وبرده قلت مش هشرب سجاير وقمت الصبح بطني بتوجعني وعندي انتفاخات وحموضه وحاجه زفت الزفت وكنت ناوى ارجع عن الفيب ده
رحت الشغل وخدت معايا القطن والسلك و قلت هعمل ويكايه في الشغل
المهم عملت يجي خمس ويكات والظنيا مليطت مني والليكود خلص والحياه اسودت وانا لسه في ثالث يوم
المهم في اليوم ده كلمت واحد صاحبي وبالصدفة حكيتله فقالي انه يعرف واحد صاحبه بيشرب فيب وبيشوفه بيعمل الحاجات دي
اتفقت معاه يكلمه ويشوف هيرضي يساعدني ولا ايه
شويه لقيته بيكلمني وبيقولي انه يجيبه ويجيلي البيت بالليل
وفعلا جولي واتعرفت علي صاحبه ولقيته بيقولي ايه المشكله ووريني الفيب
فشاف البود ولقيت فتح شنطه معاه وطلع سلك ومقص وقطن و قصافه وعلبه فيها حاجات زي المسامير وطقم مفكات وابتدي يشتغل ويشرحلي وعملي الوكايه وطبعا حطلي ليكود من معاه وشربت والدنيا بقت زي الفل
وسألته جايب الليكود والحاجات دي منين فقالي علي مكان الاستور وقالي قوله انك من طرفي وسابلي ازازه ليكود فيها حوالي10 ملي قالي مش بيهم نفسك لحد بكره
وكان بسكوت بالذبده وماعجبنيش بصراحه بس قلت امشي بيه لحد ما اشتري و عديت بيه تاني يوم فعلا
رحت تاني يوم للاستور اللي قال لي عليه و كان راجل محترم جدا بصراحه وحكيتله علي القصه كلها
فقالي خد دوق كده من الفيب بتاعته فبصراحه عجبني الطغم جدا فقلت له تمام هات لي ازازتين منه فقالي لا خدلك ازازه واحده وجرب وفي نصها كده تعالالي وخد حساب الازاه وقام مغيرلي الكويل والقطنه و معبالي الكارتدج من الازازه اللي اشترتها وقالي البيلد ده هديه مني وبقيت ماشي فرحان جدا بالمعامله الصراحه وبقيت كل يومين اروحله اغير وكايه مره يحاسبني ومرتين لا و انا كنت بتابعه واشوفه بيعمل ايه لحد ما قررت اني اجرب اعمل ال البيلد كله لوحدي لحد مابقيت استاذ وخلاص مابقتش اروحله غير عشان اشترى ليكود او اوقطن. وحبيت الفيب وبقينا اصحاب
المقال القادم عن الليكود وازاي دخلت مجال الداي

2 thoughts on “انا والفيب من الباسيتو ل السلام عليكم … ا: كامل صالح

  1. An interesting discussion is definitely worth comment. I do think that you need to publish more about this subject matter, it might not be a taboo subject but usually people do not speak about such topics. To the next! Cheers!!

  2. يقول كامل صالح:

    شكرا للاستاذ ابراهيم البدرى علي ثقة فينا ونشره للمقال
    بالتوفيق دائما

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *